یورپی یونین کا سخاروف انعام، مہسا امینی کے نام

اس سال یورپی یونین کا انسانی حقوق کے لیے سخاروف انعام بعد از مرگ کرد خاتون جینا مہسا امینی اور ایران میں ان کی موت کے بعد خواتین کی زندگی اور آزادی کے لیے شروع ہونے والی تحریک کو دیا گیا۔

جینا مہسا امینی کون تھیں؟

امینی کو ایران کی اخلاقی پولیس نے ستمبر 2022 میں مبینہ طور پرنامناسب طریقے سے حجاب لینے کے الزام میں گرفتار کیا تھا۔ 22 سالہ مہسا امینی  کی دوران حراست موت ہو گئی تھی۔ ایرانی حکام کا دعویٰ ہے کہ ان کی موت  انہیں پہلے سے لاحق نامعلوم طبی حالت کی وجہ  سے ہوئی تھی۔

امینی کا تعلق مغربی ایران میں کرد اکثریتی شہر ساقیز سے تھا۔ ان کی موت نے تہران حکومت کے خلاف ملک گیر احتجاج کو جنم دیا۔ اس کے بعد ہونے والے کریک ڈاؤن میں سینکڑوں مظاہرین مارے گئے جبکہ متعدد ابھی تک گرفتار ہیں۔

ایوارڈ کی فاتح کے نام کا اعلان کرنے کے بعد یورپی پارلیمنٹ کی صدر روبرٹا میٹسولا نے کہا کہ امینی کی موت ''ایک اہم موڑ‘‘ ہے۔ انہوں نے کہا، ''اس نے خواتین کیقیادت میں ایک تحریک کو جنم دیا ہے جو تاریخ رقم کر رہی ہے۔‘‘ انہوں نے مزید کہا کہ یہ تحریک خواتین کی ''ایران میں وقار اور آزادی‘‘ کے لیے کھڑی ہے۔

انہوں نے کہا کہ یہ ایوارڈ''ایران کی بہادر خواتین، مردوں اور نوجوانوں کو خراج تحسین  ہے، جو تبدیلی کے لیے آگے بڑھ رہے ہیں۔‘‘

اس ماہ کے شروع میں انسانی حقوق کے کارکنوں نے اخلاقی پولیس پر تہران میٹرو پر سوار ہونے والی ایک 16 سالہ لڑکی کوپیٹنے کا الزام لگایا تھا۔ اس واقع کی سی سی ٹی وی فوٹیج بھی سامنے آئی تھی، جس میں ایک لڑکی کو سب وے ٹرین سے زبردستی کھینچ کراتار لیا گیا تھا۔

ستمبر میں انسانی حقوق کے گروپوں نے دعویٰ کیا کہ ایرانی حکام نے امینی کے خاندان کو اس کی موت کی پہلی برسی منانے سے روک دیا تھا۔

یورپی یونین کا سخاروف انعام کیا ہے؟

یہ انعام یورپی پارلیمنٹ کی جانب سے آزادی فکر اور انسانی حقوق کا دفاع کرنے والے افراد اور گروہوں کو دیا جاتا ہے۔ اس کا نام سوویت ماہر طبیعیات، سیاسی منحرف اور 1975 کے نوبل امن انعام یافتہ آندرے سخاروف کے اعزاز میں رکھا گیا ہے۔

2023 کے سخاروف ایوارڈ کے لیے دوسرے فائنلسٹس میں نکاراگوا سے ولما نونیز ایسکورسیا اور بشپ رولینڈو خوزے الواریز لاگوس کے ساتھ ساتھ مفت، محفوظ اور قانونی اسقاط حمل کے لیے جدوجہد کرنے والی پولینڈ کی جسٹینا وائیڈرزینکا، ایل سلواڈور کی مورینا ہیریرا، اور یو ایس کی کولین میک نکولس شامل تھے۔

گزشتہ برس کا سخاروف انعام یوکرین کے عوام کو روس کی جنگ کے دوران "جمہوریت، آزادی اور قانون کی حکمرانی کے تحفظ" پر دیا گیا تھا۔  خیال رہے کہ رواں برس کا نوبل امن انعام بھی انسانی حقوق کی ایرانی کارکن نرگس محمدی کو دیا گیا تھا۔ محمدی گزشتہ دو برسوں سے ایران میں زیر حراست ہیں۔

ش ر⁄ ک م (اے ایف پی، اے پی)