چین کی سالانہ برف اور سنو فیسٹیول

ہر سال شمال مشرقی چینی شہر ہاربین میں فنکار برف سے ایک نیا شہر تخلیق کرتے ہیں۔ فن کے یہ نمونے اپنی مثال آپ ہوتے ہیں۔ ہر سال یہ انٹرنیشنل برفانی فیسٹول پانچ جنوری سے شروع ہوتا ہے۔

ہاربین کے فیسٹول میں شریک فنکار اپنی تخلیقات کو حتمی شکل دے چکے ہیں۔ ان تخلیقات کا نظارہ منجمد دریائے سونگ ہُوا سے بھی کیا جا سکتا ہے۔ رات کو اس شہر میں درجہ حرارت منفی چالیس ڈگری سینٹی گریڈ تک پہنچ جاتا ہے۔ دن بھر یہ درجہ حرارت منفی دس ڈگری سینٹی گریڈ رہتا ہے۔

برف کے بلاک کو فنکار اپنی ضرورت کے مطابق بجلی سے چلنے والی آری استعمال کر کے کاٹتے ہیں۔ اس سارے عمل میں انتہائی احتیاط برتی جاتی ہے۔ برف سے شاہکار کی تخلیق کے لیے مختلف اوزاروں کا بھی استعمال کیا جاتا ہے۔

منجمد برف کے بلاک کو کاٹنے اور جوڑنے کے لیے پانی کا استعمال کیا جاتا ہے۔ کسی بھی کریک یا جوڑ یا سوراخ کو بند کرنے کے لیے بھی صرف پانی ہی کی ضرورت ہوتی ہے۔

ہاربین کے برفانی شاہکاروں کے لیے بارہ ہزار کے قریب ورکرز برف تراشی میں مصروف ہوتے ہیں۔ منتظمین کے مطابق اس فیسٹیول کی تیاری کے لیے ایک نئی چھوٹی سی بستی بسانا پڑتی ہے تا کہ ہزاروں افراد اس میں آباد ہو سکیں۔ ان افراد کا تعلق قریب اور دور کے علاقوں سے ہوتا ہے۔

برف میں دن بھر کام کرنے والے ہزاروں افراد کو مناسب اور توانا رکھنے کے لیے آرام و راحت کی بھی ضرورت ہوتی ہے۔ اس مقصد کے لیے پلاسٹک کے خیموں میں گرما گرم خوراک اور کافی کا بند و بست کر کے رکھا جاتا ہے۔ یہ خیمے فیسٹیول کے مقام سے باہر لگائے جاتے ہیں۔

ہاربین کا تہوار پہلی مرتبہ سن 1985 میں منعقد کیا گیا تھا۔ تاہم چین میں برف تراشی کی ایک قدیمی روایت بھی موجود ہے۔ برف تراشی کا سترہویں صدی سے تعلق بیان کیا جاتا ہے۔

اس فیسٹیول میں آگ برساتی ہوئی چینی ڈریگون کے مختلف روپ برف تراشی سے تخلیق کیے جاتے ہیں۔ یہ ڈریگون چینی ثقافت اور تاریخ کا ایک اہم استعارہ ہے۔ اس فیسٹیول کے لیے اسی فٹ بال میدانوں کے برابر کا علاقہ مختص کیا جاتا ہے۔

رات کے وقت برف کے شاہکاروں کو رنگ برنگی روشنیوں سے سجا دیا جاتا ہے۔ اس باعث اس فیسٹیول کا شبینہ منظر جداگانہ ہوتا ہے۔ اس مقصد کے لیے ہزراوں لائٹیں لگائی جاتی ہیں۔