نړېوال ريکارډ؛ د اور لګیت له لرګیو جوړ د ایفل برج

فرانسوي ريچارد پلاوډ د اور لګیت یا ګوګړو له لرګيو څخه د ایفل تر ټولو لوړ برج جوړ کړی. په دغه برج کې د اور لګیت څه باندې ۷۰۶زره لرګي او ۳۲ کیلو سريښ کارول شوي دي. په جوړولو یې ۴۲۰۰ ساعتونو، څه باندې اته کاله تېر شوي دي.

پلاود د برج تر جوړوېدو وروسته روانه اوونۍ وويل چې هغه داسې احساس کوي لکه د تفريحي اورګاډي په کابین کې چې ناست وي. هغه رويټرز ته وويل: «ما د اتو کلونو له پاره تل دا فکر کاوه چې د ګوګړو یا اور لګیت له لرګيو تر ټولو لوړ ساختمان جوړ کړم.»

پلاوډ له عادي ګوګړو چې په بازار کې خرڅيږي، استفاده کړې خو د هغو تور سرونه ېې قطع کړي دي. اما هغه له دغه کاره ستړی شو او له کارخانې ېې غوښتنه وکړه تر څو ورباندې د اور لګیت ساده ډکې خرڅ کړي.

د ګينس د ريکارډونو کتاب په ابتدا کې د پلاوډ پروپوزل رد کړ خو وروسته ېې ورڅخه هرکلی وکړ.

د ګينس نړيوال ريکارډونو مشر، مارک مک کينلي وويل: «موږ واقعاً هيجاني او خوښ شولو چې وتوانيدو دا تصدیق کړو.» هغه وويل چې دوی د اور لګیت د نوعیت په هکله په ابتدا کې يو څه ګيچ شوي وو، خو په رسمي توګه د ریچارډ پلاوډ هڅې حېرانوونکي دي

په پاریس ښار کې د ایفل برج، مهندس ګوستاف ایفل لخوا طراحي شو. د هغه د سر یوه مجسمه د دغه برج لاندې نصب ده.

د فرانسې په پاریس ښار کې د ایفل برج فرانسوي انجنیر الکساندر ګوستاف (۱۸۳۲-۱۹۲۳) ایفل طراحي او جوړ کړی. دغه فرانسوی انجنیر تر ډېره د همدې برج په خاطر مشهور دی.

په فرانسه کې د ایفل برج د نړۍ له ډېر ليدونکي او نوموتو سيل ځایونو څخه دی. هر کال د نړۍ له مختلفو برخو څخه په ميلیونونو سیلانیان پاریس ته ځي او د دغه برج کتنه کوي.

فرانسې د ایفل برج په پاریس کې د ۱۸۸۹ ایکسپو یا نړېوال نندارتون په مناسبت جوړ کړ. دغه انځور د ۱۸۸۸ کال په شاوخوا کې د برج د جوړېدو پر مهال احیستل شوی دی.