Словачка: Здравствената состојба на Фицо се стабилизира

Три дена по обидот за атентат врз словачкиот премиер Роберт Фицо, состојбата на критично повредениот политичар очигледно се подобрува. Уште една двочасовна операција во петокот „придонесе за позитивна прогноза за здравјето на шефот на владата“, рече словачката министерка за здравство Зузана Долинкова денеска (18 мај, 2024) во клиниката во регионалниот главен град Банска Бистрица.

Не е можно преместување на Фицо во Братислава

Министерот за одбрана на Словачка, Роберт Калинак додаде дека нема да биде можно да се пренесе пациентот во главниот град Братислава во наредните денови. Калинак е и прв вицепремиер и го заменува Фицо за време на неговото отсуство.

59-годишниот Фицо беше тешко ранет од неколку истрели во средата (15 мај, 2024) во гратчето Хандлова, а потоа беше опериран неколку часа. Во петокот, Калинак ја опиша состојбата на премиерот како „многу сериозна“. Прорускиот шеф на владата продолжи да се лекува во болницата во Банска Бистрица, каде што беше примен по нападот во средата.

Осомничениот напаѓач е изведен пред кривичен суд

Фицо беше погоден од неколку истрели додека разговараше со граѓаните на улица по седницата на владата во малиот град Хандлова. Осомничениот атентатор, 71-годишен писател аматер од централниот словачки град Левице, веднаш беше совладан од безбедносните сили на местото на настанот и уапсен. Денеска тој беше изведен пред кривичен суд кој одлучува за  продолжување на неговиот притвор.

Според министерот за внатрешни работи, Матуш Сутај Есток, обвинетиот е „сторител самец“ кој бил разлутен поради исходот од претседателските избори во Словачка на кои победи Петер Пелегрини, сојузник на прорускиот популист Фицо.