Плановите за нова европска заедница стануваат поконкретни

Шефовите на држави или влади на 44 европски држави ќе добијат покана за средба која треба да се одржи на 6 октомври во Прага, јавува германската агенција ДПА, повикувајќи се на изјави од неименуван службеник во ЕУ. Покрај 27-те земји членки на ЕУ, на средбата треба да бидат присутни и претставници на шесте држави од Западен Балкан, меѓу кои и Северна Македонија. Освен тоа, на средбата треба да пристигнат и претставници на Украина, Турција, Велика Британија, Швајцарија, Норвешка, Исланд, Лихтенштајн, Молдавија, Грузија, Ерменија и Азарбејџан.

Целта на новата европска политичка заедница е да се овозможи поблиска соработка и размена меѓу ЕУ-земјите и партнерите кои не се дел од Унијата. На првата средба во главниот град на Чешка, меѓу другото, би требало да се разговара за руската инвазија на Украина и енергетската криза и економската состојба. Средбата, како што се вели, ќе биде организирана во предвечерјето на неформалниот самит на ЕУ, кој треба да се одржи на 7 октомври.

Француската иницијатива за новиот формат во меѓувреме има поддршка и од Германија. Германскиот канцелар Олаф Шолц на крајот на август изјави дека во моментов недостига форум на кој шефовите на држави или влади на ЕУ би разговарале со партнерите за централни теми еднаш или двапати годишно. Шолц истовремено потенцираше дека таквиот формат не би требало да е алтернатива за проширувањето на ЕУ.

Идејата за нова политичка заедница ја лансираше францускиот претседател Емануел Макрон во мај годинава. Макрон сака преку неа да се зајакне соработката со партнерите кои во догледно време нема да станат членки на ЕУ или државите кои не сакаат да станат членки на Унијата.