32-годишниот клучар Кристијан Костоски има клуч за секоја брава. Тој ја негува семејната традиција стара над 70 години.
„Од мал доаѓам тука. Не знам, од десет години. Сакав да одам, ми беше ќеф“, раскажува Кристијан додека седи во својот дуќан во Старата прилепска чаршија.
Занаетот е наследство, но вештината ја стекнал со труд: „Кога ќе влезевме овде заедно со него (дедо му, н.з.) во дуќанот, конекција внук и дедо не постоеше. Ти си чирак, калфа, па мајстор и.т.н. Беше строг. Можеби затоа сум тука кај што сум сега.“
Занаетот го започнал неговиот прадедо Милан Ѓуроски:
„Него го викале Милан ‘Царот’. Тој исто бил ливец. Од него го научил дедо ми занаетот. Еден од подобрите мајстори во градот.“
Мајстор кој со знаењето стекнал углед во Прилеп. Кристијан Костоски со насмевка објаснува:
„Прекар на дедо ми е ‘Цако’. Така е и уште фирмата, ‘Клучар Цако’. И кога нешто нема да може да се отвори демек ‘ни Цако клучарот тоа не го отвора’.“
За да се изработи еден клуч денес се потребни две до три минути. Некои модели одамна се станати минато. Времињата се менуваат, занаетот и чаршијата исто така.
„Некогаш тоа било овде калдрма, целосно било поинаква. Имало многу занаети. Многу занаети се изумрени. Сите седат пред компјутер, работат од дома и не ги интересира клуч“, оценува младиот клучар.
Развојот на технологијата е предизвик за него: „Нон-стоп има предизвик. Секој ден излегуваат нови брави, нови клучеви, нови технологии и машини. Мора да го следиш нештото за да напредуваш.“
Кристијан вели дека не знае што носи иднината, но дава сѐ од себе за да ја зачува традицијата.