Kotun Senegal ta bai wa Sonko 'yanci

Wannan hukuncin dai, zai bai wa jagoran adawar kasar ta Senegal da ke tsare a gidan kaso Ousmane Sonko damar tsayawa takara a zaben shugaban kasa da za a gudanar a badi. Mai shekaru 49 a duniya Sonko wanda aka bayyana da bai cancanci tsayawa takara ba bayan da aka iza keyarsa gidan kaso a watan Yunin wannan shekara, yana da wa'adin nan da ranar 26 ga wannan wata na Disamba da muke ciki ya tattara tare da mika duk wasu takardunsa na neman tsayawa takara a zaben watan Fabarairun shekara mai zuwa ta 2024.